Faith statement

1. ስድሳ ስድስቱን የብሉይ ኪዳን እና የአዲስ ኪዳን መጻህፍት የያዘውን መጽሐፍ ቅዱስ የእግዚአብሔር እስትንፋሳዊ ቃል ምንም ስህተት የማይገኝበት እምነትን እና ተግባርን በሚመለከት ሁሉ የመጨረሻ ሥልጣን ያለው እንደሆነ እናምናለን፡፡

2. በእግዚአብሔር አብ፤ በእግዚአብሔር ወልድ ፤ በእግዚአብሔር መንፈስ ቅዱስ አንድ አምላክ እናምናለን፡፡

3. በመፍጠር ሥራ ፍጥረትን በመጠበቅ በመገለጥ በመዋጀት እና በመጨረሻው ፍርድ የእግዚአብሔርን ፍፁም ሥልጣና የበላይነት እናምናለን፡፡

4. ጌታችን ኢየሱስ ክርስቶስ ከአብ የተላከ መሆኑን በመንፈስ ቅዱስ መፀነሱን፤ ከድንግል ማሪያም መወለዱን፤ ፍፁም ሰው ፍፁም አምላክ መሆኑን ፤ ለሰው ልጆች ቤዛ ሆኖ በመስቀል ላይ መሞቱን ፤ መቀበሩን ፤ በሶስተኛው ቀን በአካል ከሙታን መነሳቱን፤ ወደ አብ ማረጉን እና አሁን በአብቀኝ ሆኖ ስለእኛ እንደሚማልድ፤ ደግሞም በህያዋን እና በሙታን ላይ ሊፈርድ በክብርና በግርማ እንደሚመለስ እናምናለን፡፡

5. መንፈስ ቅዱስ የመለኮት ባህሪያት ሁሉ ያሉት ፍፁም አምላክ እንደሆነና አምልኮ ስግደት እንደሚገባው እናምናለን፡፡

6. ሰው በእግዚአብሔር አምሳል መፈጠሩን ፤ በኃጢአት መውደቁንና በዚህም ምክንያት የእግዚአብሔር ቁጣና ፍርድ ያለበት በደለኛ መሆኑን እናምናለን፡፡

7. ሰው ከኃጢአት እዳ ኃይልና ቅጣት ሊድን የሚችለው ኃጢአት የሌለበት የእግዚአብሔር ልጅ ኢየሱስ ክርስቶስ የሰው ምትክ ሆኖ በፈጸመው የቤዛነት ስራ ብቻ በመሆኑ ኃጢአተኛ በእግዚአብሔር ጸጋ በኢየሱስ ክርስቶስ በማመን ብቻ እንደሚፀድቅ እናምናለን፡፡

8. ኃጢአተኛ በኃጢአቱ ተጸጽቶ ንስሃ እንደሚገባ በኢየሱስ ክርስቶስ አምኖ ዳግመኛ በመወለድ አዲስ ፍጥረት እንዲሆን መንፈስ ቅዱስ በሕይወቱ እንደሚሰራ እናምናለን፡፡

9. መንፈስ ቅዱስ በአማኝ ሕይወት ውስጥ እንደሚኖር አማኙ በመንፈስ ቅዱስ ሲጠመቅ ኃይል እንደሚቀበል እና በልሳን እንደሚናገር በየጊዜውም በመንፈስ ቅዱስ እንደሚሞላ እናምናለን፡፡

10. መንፈስ ቅዱስ ዛሬም ለአማኞች ልዩ ልዩ የፀጋ ስጦታዎችን በማካፈል ድውዮችን በመፈወስ አጋንንትን በማውጣትና ታምራትን በማድረግ እንደሚሰራ እናምናለን፡፡

11. ቤተክርስቲያን በክርስቶስ የተሰጣትን የታላቁን ተልዕኮ አደራ በመወጣት ወንጌልን ለሰዎች ሁሉ እንድትሰብክና አማኞችን ደቀመዛሙርት በማድረግ ለክርስቶስ አካል መታነፅ አስፈላጊውን ሁሉ መፈጸም እንድትችል መንፈስ ቅዱስ ሐዋርያትን ፤ ነቢያትን፤ ወንጌል ሰባኪዎችን ፤ እረኞችንና አስተማሪዎችን እንዲሁም ሌሎች የአገልግሎት ስጦታዎችን እንደሚሰጥ እናምናለን፡፡

12. ከእግዚአብሔር መንፈስ ዳግም የተወለዱ ሁሉ በሚገኙባት የክርስቶስ አካል በሆነች በአንዲት ቅድስት ቤተክርስቲያን እናምናለን፡፡

13. ጌታችንና መድኃኒታችን የኢየሱስ ክርስቶስ ባዘዘው መሠረት ዳግም የተወለደ አማኝ ከክርስቶስ ሞትና ትንሣኤ ጋር መተባበሩን ለመግለፅ በአብ በወልድ በመንፈስ ቅዱስ ስም በውኃ ውስጥ በመጥለቅ እንደሚጠመቅ እንዲሁም ጌታ ዳግም እስኪመጣ ድረስ ሞቱን ለመናገር ከጌታና ከአማኞች ጋር ያለው ኅብረት ለመግለጽ የጌታ እራት እንደሚካፈል እናምናለን፡፡

14. በሙታን ትንሣኤ በኃጥአን ላይ በሚደርሰው የዘላለም ፍርድ አማኞች በሚቀበሉት የዘላለም ሕይወት እናምናለን፡፡

Comments are closed